ಭುರ್ಗ್ಯಾಂಚ್ಯಾ ಗಿಮ್ಶಿಲ್ಯಾ ರಜೆ ಶಿಬಿರಾಚೆ ಉದ್ಘಾಟನ್ ಆನಿ ಸಮಾರೋಪ್ ಕಾರ್ಯೆಂ

ಪೊಂಪೈ ಮಾಯೆಚಿ ಫಿರ್ಗಜ್, ಗುರ್ಪುರ್ ಕೈಕಂಬ​, ಕಥೊಲಿಕ್ ಸಭಾ ಘಟಕಾಚ್ಯಾ ಮುಖೇಲ್ಪಣಾಖಾಲ್ ಲಾಯಿಕ್ ಆಪೊಸ್ತಾಲಾದಿಂಚೊ ಆಯೋಗ್ ಆನಿ ದೇವ್ ಆಪವ್ಣೆಂ ಆನಿ ಯಾಜಕೀ ತರ್ಭೇತಿಚೊ ಆಯೋಗಾಂಚ್ಯಾ ಸಹಯೋಗಾನ್ ಆಸಾ ಕೆಲ್ಲ್ಯಾ, ಭುರ್ಗ್ಯಾಂಚೊ ಜುಬ್ಲೆವ್/ಗಿಮ್ಶಿಲ್ಲೆಂ ರಜೆ ಶಿಬಿರಾಚೆ ಉಗ್ತಾವಣ್ ಕಾರ್ಯೆಂ ಏಪ್ರಿಲ್ ಮಹಿನಾಚ್ಯಾ 28 ತಾರಿಕೆರ್ ಸೊಮಾರಾ ಸಕಾಳಿಂ 9 ವರಾರ್ ಪೊಂಪೈ ಸಭಾ ಭವನಾಂತ್ ಚಲವ್ನ್ ವೆಲೆಂ. ಹ್ಯಾ ಕಾರ್ಯ್ಯಾಕ್ ಘಟಕಾಚೊ ಆತ್ಮೀಕ್ ನಿರ್ದೇಶಾಕ್ ತಶೆಂಚ್ ಫಿರ್ಗಜ್ ವಿಗಾರ್-ಭೋವ್ ಮಾನಾಧಿಕ್ ಬಾಪ್ ರುಡೊಲ್ಫ್ ರವಿ ಡೆಸಾ, ಫಿರ್ಗಜ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಮಾನೆಸ್ತ್ ರೋಮನ್ಸ್ ಲೋಬೊ, ಕಾರ್ಯದರ್ಶಿ ಮಾನೆಸ್ತ್ ಜೊನ್ಸನ್ ಲೋಬೊ, ಆಯೋಗಾಚಿ ಸಂಯೋಜಕಿ ಶ್ರೀಮತಿ ಹಿಲ್ಡಾ ಮಿನೇಜಸ್, ಕಥೊಲಿಕ್ ಸಭಾ ಘಟಕಾಚೊ ಅಧ್ಯಕ್ಷ್ ಶ್ರೀ| ಗ್ಲೇನ್ ರೋಶನ್ ಡಿಕುನ್ಹಾ, ಕಾರ್ಯದರ್ಶಿ ಶ್ರೀ| ಮೆಲ್ವಿನ್ ಡಿಸೋಜ ವೆದಿರ್ ಹಾಜರ್ ಆಸ್'ಲ್ಲಿಂ.

ಘಟಕಾಚ್ಯಾ ಅಧ್ಯಕ್ಷಾನ್ ಜಮ್ಲೆಲ್ಲ್ಯಾ ಸರ್ವಾಂಕ್ ಮೊಗಾಚೊ ಬರೊ ಯೆವ್ಕಾರ್ ಮಾಗ್ಲೊಂ. ಉಪ್ರಾಂತ್ ವೆದಿರ್ ಸೊಭೈಲ್ಲ್ಯಾ ಕೆಳ್ಬ್ಯಾಂಕ್ ವಿವಿಧ್ ಸಂದೇಶ್ ಆಟಾಪುಲ್ಲೆಂ ಕೊಲೆ ತೊಪುನ್ ಸೊಭಿತ್ ಜಡ್ ತಯಾರ್ ಕರ್ನ್ ವಿಶಿಷ್ಟ್ ರಿತಿನ್ ಉಗ್ತಾವಣ್ ಕೆಲೆಂ. ವಿಗಾರ್ ಬಾಪಾಂನಿ ಆಪ್ಲ್ಯಾ ಸಂದೇಶಾಂತ್ "ಖುಶಿ ಜಾತಾ ಸಾಂಗೊಕ್ ಆತಾ ಬರಿ ಖಬರ್" ಮ್ಹುಳ್ಳೆಂ ಗೀತ್ ಗಾವ್ನ್ ಶಿಬಿರ್ ಚಲವ್ನ್ ವರುಂಕ್ ಜೆಪ್ಪು ಸೆಮಿನರ್ ಥಾವ್ನ್ ಹಾಜರ್ ಜಾಲ್ಲ್ಯಾ ಬ್ರ​| ಅವಿಲ್, ಬ್ರ​| ಜೊಸ್ಟನ್ ಆನಿ ಬ್ರ​| ಅಜೆಯ್ ಹಾಂಚಿ ವಳಕ್ ಕರ್ನ್ ದೊನೀ ದಿಸಾಂಚ್ಯಾ ಶಿಬಿರಾಂತ್ ಬರೊ ಫಾಯ್ದೊ ಜೊಡುಂಕ್ ಭುರ್ಗ್ಯಾಂಕ್ ಉಲೊ ದಿಲೊ. ಉಪ್ರಾಂತ್ ಕಾರ್ಯದರ್ಶಿನ್ ಧನ್ಯವಾದ ಸವೆಂ ವೆದಿ ಕಾರ್ಯೆಂ ಆಖೇರ್ ಕೆಲೆಂ.

ಉಪ್ರಾಂತ್ ಬ್ರದರಾನಿಂ ವ್ಹಡಾಚೆಂ ಆನಿ ಲ್ಹಾನ್ಹಾಂ ಭುರ್ಗ್ಯಾಂಚೆ ಚ್ಯಾರ್ ಪಂಗಡ್ ಕರ್ನ್ ಖೆಳಾ ಮುಕಾಂತ್ರ್ ಏಕಾಮೆಕಾಚಿ ಕಶಿ ವಳಕ್ ಕರ್ಚಿಂ ಆನಿ ಏಕಾಮೆಕಾ ಕಶೆಂ ಉಲೊಂವ್ಚೆಂ ಮ್ಹುಣ್ ಶಿಕಯ್ಲೆಂ. ದೋನ್ ದಿಸಾಂನಿ ಖೆಳ್ ಖೆಳೊವ್ನ್, ಪಂಗಡ್ ಚಟುವಟಿಕೊ ಕರ್ನ್, ಬೈಬುಲಾಚಿಂ ಜಾಣ್ವಾಯ್, ಕಥೊಲಿಕ್ ಸಮುದಾಯಾ ವಿಶಿಂ ಆನಿ ದೇವ್ ಆಪವ್ಣ್ಯಾ ವಿಶಿಂ ತರ್ಭೆತಿ ದಿಲಿ. ಗಿತಾಂ ಶಿಕವ್ಣ್, ಪಂಗಡ್ ಸ್ಪರ್ಧೆ ಆಸಾ ಕರ್ನ್, ಭುರ್ಗ್ಯಾಂಕ್ ಲಿತುರ್ಜಿ ಮಾಂಡುನ್ ಹಾಡ್ನ್, ಭುರ್ಗ್ಯಾಂಕ್ ಮುಖೇಲ್ಪಣಾ ವಿಶಿಂ ತರ್ಭೆತಿ ದಿಲಿ.

ಭುರ್ಗ್ಯಾಂಕ್ ದೊನಿ ದಿಸಾ ದನ್ಪರಾಂ 12.15 ವರಾರ್ ಮಿಸಾಚೆಂ ಬಲಿದಾನ್ ಆಸಾ ಕೆಲೆಂ. ದೋನ್ ದೀಸ್, ಗುರ್ಪುರ್ ಆನಿ ಇಗರ್ಜೆ ವಾಡ್ಯಾಚ್ಯಾ ಗುರ್ಕಾರ್, ಪ್ರತಿನಿಧಿ ಆನಿ ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್, ಸಾಕಾಳಿಂ ಕಾಫಿ-ಫಳ್ಹಾರ್, ದನ್ಪಾರಾಂ ಜೆವಾಣ್, ಐಸ್-ಕ್ರೀಮ್ ಆನಿ ಸಾಂಜೆರ್ ಥಂಡ್ ಪೀವನಾಚಿ ವ್ಯವಸ್ಥಾ ಕೆಲ್ಲಿ. 29 ತಾರಿಕೆರ್ ಮಂಗ್ಳಾರಾ ಸಾಂಜೆರ್ 3.30 ಕ್ ಸಮಾರೋಪ್ ಕಾರ್ಯೆಂ ಆಸಾ ಕೆಲ್ಲೆಂ.

ಹ್ಯಾ ಕಾರ್ಯಾಕ್ರಮಾಕ್ ಫಿರ್ಗಜ್ ವಿಗಾರ್ ತಶೆಂಚ್ ಘಟಕಾಚೊ ಆತ್ಮಿಕ್ ನಿರ್ದೇಶಕ್ ಭೊ| ಮಾ| ಬಾ| ರುಡೊಲ್ಫ್ ರವಿ ಡೆಸಾ, ಬ್ರ​| ಅವಿಲ್, ಬ್ರ| ಜೊಸ್ಟನ್, ಬ್ರ| ಅಜೆಯ್, ಆಯೋಗಾಚಿ ಸಂಯೋಜಕಿ ಶ್ರೀಮತಿ ಹಿಲ್ಡಾ ಮಿನೇಜಸ್, ಘಟಕಾಚೊ ಅಧ್ಯಕ್ಷ್ ಶ್ರೀ| ಗ್ಲೇನ್ ರೋಶನ್ ಡಿಕುನ್ಹಾ ಆನಿ ಕಾರ್ಯದರ್ಶಿ ಶ್ರೀ| ಮೆಲ್ವಿನ್ ಡಿಸೋಜ ವೆದಿರ್ ಹಾಜರ್ ಆಸ್‌'ಲ್ಲೆಂ. ಕು| ರೀನಾ ಡಿಸೋಜನ್ ಸರ್ವಾಂಕ್ ಸ್ವಾಗತ್ ಕೆಲೊ. ಕು| ಎಲ್ವಿನಾ ಮೊರಾಸ್ ಆನಿ ಮಾಸ್ಟರ್ ನೈಜಿಲಾನ್ ಆಪ್ಲಿಂ ಭೊಗ್ಣಾ ಸರ್ವಾಂ ಮುಕಾರ್ ಪ್ರಸ್ತುತ್ ಕೆಲೆಂ. ಉಪ್ರಾಂತ್ ಬ್ರ​| ಅವಿಲಾನ್ ಆಪ್ಲೊ ಸಂದೇಶ್ ದೀವ್ನ್ ಭುರ್ಗ್ಯಾಂಕ್ ಬರೆಂ ಮಾಗ್ಲೆಂ ಆನಿ ಸ್ಪರ್ಧ್ಯಾನಿಂ ಜಿಕ್ಲೆಲ್ಲ್ಯಾ ತಶೆಂಚ್ ಭಾಗ್ ಘೆತ್ಲೆಲ್ಲ್ಯಾ ಭುರ್ಗ್ಯಾಂಕ್ ಇನಾಮಾಂ ವಾಂಟ್ಲಿಂ.

ವಿಗಾರ್ ಬಾಪಾಂನಿ ಆಪ್ಲ್ಯಾ ಸಂದೇಶಾಂತ್ ಸಹಕಾರ್ ದಿಲ್ಲ್ಯಾ ಹರ್ಯೆಕ್ಲ್ಯಾಂಚೊ ಉಗ್ಡಾಸ್ ಕಾಡ್ನ್ ದೇವ್ ಬರೆಂ ಕರುಂ ಮ್ಹುಣ್. ಶಿಬಿರ್ ಚಲವ್ನ್ ವೆಲ್ಲ್ಯಾ ಬ್ರದರಾಂಕ್ ಉಗ್ಡಾಸಾಚಿ ಕಾಣಿಕ್ ದಿಲಿ. ಕು| ಐರಲ್ ಸುಜನ್ ಕ್ರಾಸ್ತಾನ್ ಧನ್ಯವಾದ ಸವೆಂ ಅರ್ಗಾಂ ಗೀತ್ ಗಾವ್ನ್ ಸಮಾರೋಪ್ ಕಾರ್ಯೆಂ ಆಖೇರ್ ಕೆಲೆಂ. ಹೆಂ ಸಗ್ಳೆಂ ಕಾರ್ಯೆಂ ಕು| ಜೊಯ್ಲಿನಾನ್ ಚಲವ್ನ್ ವೆಲೆಂ.

ಉಪ್ರಾಂತ್ ಏಕ್ ವರ್ ಬರಾಬರ್ ಉದ್ಕಾ ಖೆಳ್ ಖೆಳೆಯ್ಲೆಂ. ಹ್ಯಾ ಸಗ್ಳ್ಯಾ ಕಾರ್ಯಾಕ್ ಕಥೊಲಿಕ್ ಸಭೆಚ್ಯಾ ಸಾಂದ್ಯಾ ಸಾಂಗಾತಾ ವೈ.ಸಿ.ಯಸ್ ಭುರ್ಗ್ಯಾಂನಿ ಸಹಕಾರ್ ದಿಲೊ. ಪ್ರಮೀತ್ ಡಿಸೋಜ ಹಾಣೆಂ ತಸ್ವೀರ್ ಕಾಡ್ನ್ ಸಹಕಾರ್ ದಿಲೊ.