ಇಗರ್ಜೆ ವಾಡ್ಯಾಚೆಂ ಪಿಕ್ನಿಕ್

ವೆಲಂಕಣಿ ಮಾಯೆಕ್ ಸಮರ್ಪಿಲ್ಲ್ಯಾ ಇಗರ್ಜೆ ವಾಡ್ಯಾಚೆಂ ಪಿಕ್ನಿಕ್ ಫೆಬ್ರೆರ್ ಮಹಿನಾಚ್ಯಾ 2 ತಾರಿಕೆರ್ ಆಯ್ತಾರಾ ಸಕಾಳಿಂಚ್ಯಾ 8.00 ವರಾರ್ ಪೊಂಪೈ ಮಾಯೆಚ್ಯಾ ದೇವ್ ತೆಂಪ್ಲಾಚ್ಯಾ ಅಂಗ್ಣಾ ಥಾವ್ನ್ ಪವಿತ್ರ್ ಅತ್ಮ್ಯಾಚಿ ತಶೆಂಚ್ ಮರಿಯೆ ಮಾಯೆಚಿ ಮಜತ್ ಮಾಗೊನ್ ಬಸ್ಸಾರ್ ರಿಲ್ಯಾಕ್ಷ್ ಲೀಜರ್ ಪಾರ್ಕ್, ಬ್ರಹ್ಮಾವರ್ (Relax Leisure Park Brahmavar) ಹಾಂಗಾಸರ್ ಆಸಾ ಕೆಲ್ಲ್ಯಾ ಪಿಕ್ನಿಕಾಕ್ 29 ಕುಟ್ಮಾಂ ಥಾವ್ನ್ ಭುರ್ಗಿಂ, ಯುವಜಣಾಂ ಆನಿ ವ್ಹಡಾಂ ಆಶೆಂ 46 ಸಾಂದೆ ಹಾಜರ್ ಆಸೊನ್ ಆಮ್ಚೆಂ ಪಯ್ಣ್ ಆರಂಭ್ ಕೆಲೆಂ. ಪಯ್ಣಾಂ ವೆಳಾರ್ ಗಮ್ಮತ್ ಗಜಾಲಿ ಕರ್ನ್, ಪದಾಂ ಆಯ್ಕೊನ್ ಜುಸ್ತ್ 9.30 ವರಾರ್ ಬ್ರಹ್ಮಾವರ್ ನ್ಹಂಯ್ ತಡಿಕ್ ವಚೊನ್ ಪಾವ್ಲ್ಯಾಂವ್. ಥಂಯ್ಸರ್ ಆಮ್ಕಾಂ ಚಹಾ ಆನಿ ರುಚಿಕ್ ನಾಸ್ಟೊ ತಯಾರ್ ಆಸ್'ಲ್ಲೊ. ಉಪ್ರಾಂತ್ ದೋಣಿರ್ ಆಮ್ಕಾಂ ಕುದ್ರ್ಯಾಕ್ ವರ್ನ್ ಪಾವಯ್ಲೆಂ. ಥಂಯ್ಚ್ಯಾ ಮೇಲ್ವಿಚಾರಕಾಂನಿ ಆಮ್ಕಾಂ ಸ್ವಾಗತ್ ಕರ್ನ್ ಗರ್ಜೆಚೆ ಹಿಶಾರೆ ದೀವ್ನ್ ಲಾಂಬ್ ಪಯ್ಣಾನ್ ಥಂಡ್ ಪಡ್‌ಲ್ಲ್ಯಾ ಆಮ್ಕಾಂ ತಾಣಿಂಚ್ ಏಕ್ ಖೆಳ್ ಖೆಳವ್ನ್ ಉತ್ತೇಜಿತ್ (Warm up) ಕೆಲೆಂ. ಉಪ್ರಾಂತ್ ಥಂಯ್ಸರ್ ಹಾಜರ್ ಜಾಲ್ಲ್ಯಾ ಹೆರ್ ಪಂಗ್ಡಾಂಕಿ ಸಾಂಗಾತಾ ಕಾಣ್ಗೆಂವ್ನ್ (ಭರ್ಸುನ್) ಆಮ್ಕಾಂ ವಿವಿಧ್ ಖೆಳ್ ಖೆಳಯ್ಲೆಂ. ವಿವಿಧ್ ರಿತಿಚ್ಯಾ ಹ್ಯಾ ಖೆಳಾಂನಿ ಸರ್ವಾಂನಿ ಸಕ್ರೀಯ್ ಜಾವ್ನ್ ಪಾತ್ರ್ ಘೆತ್ಲೊ. ತಶೆಂಚ್ ದನ್ಪಾರ್ ಪರ್ಯಾಂತ್ ಥಂಯ್ಸರ್ ಮಾಂಡುನ್ ದವರ್ಲೆಲ್ಯಾ ವಿವಿಧ್ ಥರಾಂಚ್ಯಾ ಖೆಳಾ ಸಾಧನಾಂನಿ ಆಮಿಂ ಮಜೆನ್ ಖೆಳ್ಳ್ಯಾಂವ್. ಆಸಾ ಕೆಲ್ಲೆಂ ರುಚಿಕ್ ಜೆವಾಣ್ ಸೆವ್ನ್ ಥೊಡೊ ವೇಳ್ ಸುಖ್-ದು:ಖ್ ಆನಿ ವಿವಿಧ್ ಗಜಾಲಿಂನಿ ವೇಳ್ ಖರ್ಚುನ್ ಉಪ್ರಾಂತ್ ಉದ್ಕಾಂತ್ ಮೋಜ್-ಮಸ್ತಿ ಕರ್ನ್ ಸುಮಾರ್ 4.30 ವರಾಂ ಪರ್ಯಾಂತ್ ಸಂತೊಸಾನ್ ವೇಳ್ ಪಾಶಾರ್ ಕೆಲೊ. ಸಾಂಜೆಚಿ ಚಹಾ ಜಾತಚ್ಚ್ ಥೊಡೊ ವೇಳ್ ಪದಾಂ ಗಾವ್ನ್ 5.30 ವರಾರ್ ಪರತ್ ದೋಣಿರ್ ಪಾಟಿಂ ಯೇವ್ನ್ ಆಮ್ಚೆಂ ವಾಪಸೀ ಪಯ್ಣ್ ಸುರು ಜಾಲೆಂ. ಬಸ್ಸಾರ್ ಪಯ್ಣಾ ವೆಳಾರ್ ವಿವಿಧ್ ಸ್ನ್ಯಾಕ್ಸ್, ಥಂಡ್ ಪೀವನ್ ಇತ್ಯಾದಿ ಜಾತಚ್ಚ್ ಕಾಳೊಕ್ ಪಡ್ತಾನಾ ಆವ್ಮರಿ - ತೇರ್ಸ್ ಭೆಟವ್ನ್ ಸಗ್ಳೊ ದೀಸ್ ಬರ್ಯಾ ರಿತಿನ್ ಪಾಶಾರ್ ಕರುಂಕ್ ಫಾವೊ ಕೆಲ್ಲ್ಯಾಕ್ ವಾಡ್ಯಾ ಪಾತ್ರೊನ್ ವೆಲಂಕಣಿ ಮಾಯ್, ಫಿರ್ಗಜ್ ಪಾತ್ರೊನ್ ಪೊಂಪೈ ಮಾಯೆ ಮುಖಾಂತ್ರ್ ಸರ್ಗಿಂ ಬಾಪಾಕ್ ಅರ್ಗಾಂ ಪಾಠವ್ನ್ ಸಂತೊಸಾಚ್ಯಾ ಆನಿ ಉಲ್ಲಾಸಾಚ್ಯಾ ವದನಾಂನಿ ಸಾಂಜೆಚ್ಯಾ 7.15 ಕ್ ಆಮ್ಚ್ಯಾ ಇಗರ್ಜೆ ಥಳಾಕ್ ಪಾಟಿಂ ಪಾವ್ಲ್ಯಾಂವ್!!!.