ಪಯ್ಲ್ಯಾ ಕುಮ್ಗಾರಾಚೊ ಸಂಭ್ರಮ್

ನವೆಂಬರ್ 24 ವೆರ್ ಆಯ್ತಾರಾ, ಕ್ರೀಸ್ತ್ ರಾಯಾಚಾ ಫೆಸ್ತಾ ದಿಸಾ ಸಕಾಳಿಂಚ್ಯಾ ಮಿಸಾ ವೆಳಾರ್ ಪಯ್ಲ್ಯಾ ಕುಮ್ಗಾರಾಚೊ ಸಂಭ್ರಮ್ ಚಲ್ಲೊ. ಫಿರ್ಗಜೆಂತ್ಲ್ಯಾ 14 ನೆಣ್ತುಲ್ಯಾ ಭುರ್ಗ್ಯಾಂನಿ ಜೆಜುಕ್ ಪಯ್ಲೆಂ ಪಾವ್ಟಿಂ ಉಂಡ್ಯಾ ಆನಿ ವಾಯ್ನಾ ರುಪಾರ್ ತಾಂಚ್ಯಾ ಕಾಳ್ಜಾಂತ್ ಸೆವ್ಲೊ. ಬಜ್ಜೋಡಿ ಮಂಗಳಾ ಜ್ಯೋತಿ ಕುಟ್ಮಾ ಜಿಣ್ಯೆ ಕೇಂದ್ರಾಚೊ ದಿರೆಕ್ತೋರ್ ಮಾ| ಆಲ್ವಿನ್ ಡಿಸೋಜ ಬಾಪಾಂನಿ ಸಂಭ್ರಮಿಕ್ ಪವಿತ್ರ್ ಮಿಸಾಚೆ ಬಲಿದಾನ್ ಭೆಟಯ್ಲೆಂ ಆನಿ ಕ್ರೀಸ್ತ್ ರಾಯಾಚಾ ಫೆಸ್ತಾ ಸಂದರ್ಭಿಂ ಜೆಜು ರಾಯ್ ಸಂಸಾರಾಂತ್ಲ್ಯಾ ಹೆರ್ ರಾಯಾ ಪ್ರಾಸ್ ಕಸೊ ವೆಗ್ಳೊ ಜಾವ್ನಾಸಾ ಮ್ಹಳ್ಳೆ ವಿಶಿಂ ತುಲಾನಾತ್ಮಕ್ ರಿತಿನ್ ಅರ್ಥಭರಿತ್ ಪ್ರಸಂಗ್ ದಿಲೊ ಆನಿ ಪಯ್ಲೆಂ ಪಾವ್ಟಿಂ ಜೆಜುಕ್ ಕಾಳ್ಜಾಂತ್ ಸೆವ್'ಲ್ಲ್ಯಾ ಭುರ್ಗ್ಯಾಂಕ್ ತಶೆಂಚ್ ಪವಿತ್ರ್ ಎವ್ತರಿಸ್ತಾಚಾ ಬಲಿದಾನ ವೆಳಾ ಹರ್ಯೆಕಾ ಪಾವ್ಟಿ ಜೆಜುಕ್ ಕಾಳ್ಜಾಂತ್ ಸೆಂವ್ಚ್ಯಾ ಆಮ್ಕಾ ಸರ್ವಾಂಕ್ ಜೆಜು ರಾಯಾ ಬರಿ ಮೊಗಾನ್, ತ್ಯಾಗನ್, ಸತಾ ನಿತಿನ್, ಶಾಂತಿ ಸಮಾದಾನಾನ್ ಜಿಯೆವ್ನ್ ಜೆಜು ಬರಿ ಜಾಂವ್ಕ್ ಉಲೊ ದಿಲೊ. ಫಿರ್ಗಜ್ ವಿಗಾರ್ ಭೊ| ಮಾ| ಬಾ| ರುಡೋಲ್ಫ್ ರವಿ ಡೆಸಾ, ಫಿರ್ಗಜ್‌ಗಾರ್ ಮಾ| ಬಾ| ಮೆಲ್ವಿನ್ ಲೋಬೊ, ಮಾ| ಬಾ| ಸಂತೋಷ್ ಮಿನೇಜಸ್ ತಶೆಂಚ್ ದಿಯಾಕೊನ್ ಬಾಪ್ ವಿಕಾಸ್ ಪಿರೇರಾ ಹಾಣಿ ಸಹ ಭೆಟವ್ಣಿ ಕೆಲಿ. ವಿಗಾರ್ ಬಾಪಾಂನಿ ಆನಿ ಸಯ್ರಾ ಯಾಜಕಾಂನಿಂ ಭುರ್ಗ್ಯಾಂಕ್ ಪಯ್ಲ್ಯಾ ಕುಮ್ಗಾರಾಚೊ ಸಾಕ್ರಾಮೆಂತ್ ದಿಲೊ. ಪಯ್ಲೊ ಕುಮ್ಗಾರ್ ಸೆಂವ್ಚ್ಯಾ ಭುರ್ಗ್ಯಾಂನಿ ಭೋವ್ ಅಪುರ್ಬಾಯೆನ್ ದೇವ್ ಸ್ತುತಿ ಚಲವ್ನ್ ವೆಲಿ. ವಿಗಾರ್ ಬಾಪಾಂನಿ ಭುರ್ಗ್ಯಾಂಕ್ ಕ್ರಿಸ್ತೀ ಶಿಕೊವ್ಣ್ ದಿವ್ನ್ ಪಯ್ಲೊ ಕುಮ್ಗಾರ್ ಘೆಂವ್ಕ್ ಆಯ್ತೆಂ ಕೆಲ್ಲ್ಯಾ ಆನಿ ದೇವ್ ಸ್ತುತಿ ಚಲವ್ಕ್ ತರ್ಭೆತಿ ದಿಲ್ಲ್ಯಾ ಪೊಂಪೈ ಕೊವೆಂತಾಚಿ ಸುಪೀರಿಯರ್ ಸಿ।ಜಯಾ ಆನಿ ದಿಯಾಕೊನ್ ಬಾಪ್ ವಿಕಾಸ್ ಪಿರೇರಾ ತಶೆಂಚ್ ದೇವ್ ಸ್ತುತಿ ಆಯೋಗ್ ಕಾರ್ಯದರ್ಶಿ ಶ್ರೀಮತಿ ಪ್ರವೀಣ ಡಿಸಿಲ್ವ ಹಾಂಚೊ ಉಪ್ಕಾರ್ ಬಾವುಡ್ಲೊ. ಮಿಸಾ ಉಪ್ರಾಂತ್ ಪಯ್ಲೊ ಕುಮ್ಗಾರ್ ಸೆವ್'ಲ್ಲ್ಯಾ ಭುರ್ಗ್ಯಾಂಕ್ ವ್ಹಡಿಲಾಂ ಸವೆಂ ಉಲ್ಲಾಸುಚೆಂ ಮಟ್ವೆಂ ಕಾರ್ಯೆಂ ಶತಾಬ್ದಿ ಸ್ಮಾರಕ್ ಭವನಾಂತ್ ಆಸಾ ಕೆಲ್ಲೆಂ. ಪಯ್ಲೊ ಕುಮ್ಗಾರ್ ಸೆವ್'ಲ್ಲ್ಯಾ ಭುರ್ಗ್ಯಾಂಕ್ ದಿಯಾಕೊನ್ ಬಾಪಾಂನಿ ಘಡ್'ಲ್ಲೆಂ ಗೀತ್ ಗಾವ್ನ್ ಉಲ್ಲಾಸ್ ಪಾಟಯ್ಲೆಂ. ಹಾಜರ್ ಆಸ್'ಲ್ಲ್ಯಾ ಭುರ್ಗ್ಯಾಂಕ್ ಆನಿ ವ್ಹಡಿಲಾಂಕ್ ಕಾಫಿ ಫಳ್ಹಾರ್ ಆಸಾ ಕೆಲ್ಲೊ.