ಭಲಾಯ್ಕೆ ಶೆತಾಂತ್ಲ್ಯಾ ವಾವ್ರಾಡ್ಯಾಂಚೊ ಜುಬ್ಲೆವ್ ಆಚರಣ್ - 2025
ಜೆಜುಚ್ಯಾ ಜಲ್ಮಾಚ್ಯಾ ಜುಬ್ಲೆವ್ ವರ್ಸಾಕ್ ಆಮ್ಚ್ಯಾ ಫಿರ್ಗಜೆಂತ್ ಸೆವಾ ಆಯೋಗ್ ಪಂಗ್ಡಾಚ್ಯಾ ಮುಖೆಲ್ಪಣಾರ್, "ಭಲಾಯ್ಕೆ ಶೆತಾಂತ್ಲಿ ಸರ್ವಾಂ, ಆಮ್ಚ್ಯಾ ಸಮಾಜೆಚೆ ದಾಯ್ಜ್" ಮ್ಹಳ್ಳ್ಯಾ ಧ್ಯೇಯಾ ಖಾಲ್ ಜೂನ್ ಮಹಿನ್ಯಾಚಾ 8 ತಾರಿಕೆರ್ ಆಯ್ತಾರಾ ಸಕಾಳಿಂಚಾ 7.30 ವೊರಾಂಚಾ ಮಿಸಾಚ್ಯಾ ಅರ್ಗಾಂ ಬಲಿದಾನಾ ಸವೆಂ ಭಲಾಯ್ಕೆ ಶೆತಾಂತ್ಲ್ಯಾ ವಾವ್ರಾಡ್ಯಾಂಚೊ ಜುಬ್ಲೆವ್ ಆಚರಣ್ ಸುರ್ವಾತ್ಲೊ. ಫಿರ್ಗಜ್ ವಿಗಾರ್ ಭೊ| ಮಾ| ಬಾ| ರುಡೋಲ್ಫ್ ರವಿ ಡೆಸಾ ಬಾಪಾಂನಿ ಪವಿತ್ರ್ ಮಿಸಾಚೆ ಬಲಿದಾನ್ ಭೆಟವ್ನ್ ಭೋವ್ ಅರ್ಥಾಭರಿತ್ ರಿತಿನ್ ದೆವಾಚೆ ಉತ್ರಾ ವಯ್ರ್ ಪ್ರವಚನ್ ದಿಲೆಂ. ಭಲಾಯ್ಕೆ ಶೆತಾಂತ್ಲ್ಯಾ ವಾವ್ರಾಡ್ಯಾಂನಿ ಭೋವ್ ಅರ್ಥಾಭರಿತ್ ರಿತಿನ್ ಲಿತುರ್ಜಿ ಚಲವ್ನ್ ವ್ಹೆಲಿ.
ಮಿಸಾ ಉಪ್ರಾಂತ್ ಶತಾಬ್ಧಿ ಸಭಾ ಭವನಾಂತ್ ಸಹಮಿಲನ್ ಕಾರ್ಯೆಂ ಮಾಂಡುನ್ ಹಾಡ್‌ಲ್ಲೆ. ಸಭಾ ಭವನಾಂತ್ ಆಸಾ ಕೆಲ್ಲೊ ಕಾಫಿ ಫಳ್ಹಾರ್ ಸೆವ್ನ್ ಜಾತಾಚ್‌ ವಿಶಿಷ್ಟ್ ಸಕ್ತೆ ಆಯೋಗ್ ಕಾರ್ಯದರ್ಶಿ - ಶ್ರೀಮಾನ್ ಮೆಲ್ವಿನ್ ಸಲ್ಡಾನ್ಹಾ ಆನಿ ಸಾಂಗಾತ್ಯಾನಿ "ಜಯತು ಜಯಾ ಕ್ರಿಸ್ತಾ" ಮ್ಹಳ್ಳ್ಯಾ ಪ್ರಾರ್ಥನಾಂ ಗಿತಾ ಸವೆಂ ದೆವಾಚಿ ಆಶಿರ್ವಾದ್ ಮಾಗೊನ್, ವೆದಿ ಕಾರ್ಯಾಕ್ ಚಾಲನ್ ದಿಲೆಂ. ಕಾರ್ಯಾಚೆ ಅಧ್ಯಕ್ಷ್ ಜಾವ್ನ್, ಫಿಗರ್ಜ್ ವಿಗಾರ್ ಭೊ| ಮಾ| ಬಾ| ರುಡೋಲ್ಫ್ ರವಿ ಡೆಸಾ, ಸಂಪನ್ಮೂಲ್ ವ್ಯಕ್ತಿ ಆನಿ ಮುಖೆಲ್ ಸಯ್ರೆ ಜಾವ್ನ್, ಫಾದರ್ ಮುಲ್ಲರ್ ಆಸ್ಪತ್ರೆಚೊ ಮೆಡಿಕಲ್ ಸೂಪರಿಂಟೆಂಡೆಂಟ್ ಡೊ| ಉದಯ್ ಕುಮಾರ್, ಫಿರ್ಗಜ್ ಗೊವ್ಳಿಕ್ ಪರಿಷಧ್ ಉಪಾಧ್ಯಕ್ಷ್ - ಶ್ರೀಮಾನ್ ರೊಮಾನ್ಸ್ ಲೋಬೊ, ಕಾರ್ಯದರ್ಶಿ - ಶ್ರೀಮಾನ್ ಜೊನ್ಸನ್ ಲೋಬೊ, ಆಯೋಗ್ ಸಂಯೋಜಕಿ - ಶ್ರೀಮತಿ ಹಿಲ್ಡಾ ಮಿನೇಜಸ್, ಸೆವಾ ಆಯೋಗ್ ಪಂಗಡ್ ಸಂಚಾಲಕಿ - ಸಿ| ಡೊ| ಸಾಧನಾ ವೆದಿಚೆರ್ ಉಪಸ್ಥಿತ್ ಆಸ್‌ಲ್ಲಿಂ.
ಸಂಚಾಲಕಿನ್ ಮಾನಾಂಚಾ ಸಯ್ರ್ಯಾಂಕ್ ಆನಿ ಜಮ್ಲೆಲ್ಯಾಂ ಸರ್ವಾಂಕ್ ಸ್ವಾಗತ್ ಕೆಲೆಂ. ವೆದಿಚೆರ್ ಉಪಸ್ಥಿತ್ ಆಸ್ಲ್ಯಾ ಮಾನಾಂಚ್ಯಾ ಸಯ್ರ್ಯಾಂನಿ, ಆಯೋಗ್ ಕಾರ್ಯದರ್ಶಿ ಆನಿ ದೊಗ್ ಭಲಾಯ್ಕೆ ಶೆತಾಂತ್ಲ್ಯಾ ವಾವ್ರಾಡ್ಯಾಂನಿ ಸಾಂಗಾತಾ ಮೆಳೊವ್ನ್ ವೈದ್ಯಕೀಯ್ ಸೌಲತ್ಯಾಚಿ ಸ್ಟಿಕ್ಕರ್ಸ್ ಬೋರ್ಡಾಕ್ ಚಿಡ್ಕಾವ್ನ್ ಆನಿ ಕಾಳ್ಜಾಚೊ ಲೋಗೊ ದವರ್ನ್ ವಿಶಿಷ್ಟ್ ರಿತಿನ್ ಉಗ್ತಾವಣ್ ಚಲವ್ನ್ ವ್ಹೆಲೆಂ. ಉಪ್ರಾಂತ್, ಭಲಾಯ್ಕೆ ಶೆತಾಂತ್, ಲಾಂಭ್ ಕಾಳಾಚಿ ಸೆವಾ ದೀಂವ್ನ್ ಆಸ್ಚ್ಯಾ, ಡೊ| ಗೊಡ್ವಿನ್ ಲೋಬೊ, ಮಾನೇಸ್ತ್ ರೋಮನ್ಸ್ ಲೋಬೊ, ಆನಿ ಲಾಂಭ್ ಕಾಳಾಚಿ ಸೆವಾ ದೀವ್ನ್ ನಿವೃತ್ತಿ ಜಾಲ್ಲ್ಯಾ ಮಾನೇಸ್ತಿಣ್ ರೀಟಾ ಫೆರ್ನಾಂಡಿಸ್ ಹಾಂಕಾ ವೆದಿಚೆರ್ ಆಸ್ಲ್ಯಾ ಮಾನಾಂಚ್ಯಾ ಸಯ್ರ್ಯಾಂನಿ ಶೋಲ್, ಫುಲಾಂ ತುರೊ ಆನಿ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಸನ್ಮಾನ್ ಕೆಲೆಂ. ಸನ್ಮಾನ್ ಕಾರ್ಯೆಂ ಮಾನೇಸ್ತ್ ಮೆಲ್ವಿನ್ ಸಲ್ಡಾನ್ಹಾ ಹಾಣಿಂ ಚಲವ್ನ್ ವ್ಹೆಲೆಂ.
ಉಪ್ರಾಂತ್, ಭಲಾಯ್ಕೆ ಶೆತಾಂತ್ಲ್ಯಾ ವಾವ್ರಾಡ್ಯಾಂಕ್ ಫುಲಾಂ ಆನಿ ಉಗ್ಡಾಸಾಚಿ ಕಾಣಿಕ್ ದೀವ್ನ್ ವೆದಿರ್ ಆಸ್ಲ್ಯಾ ಮಾನಾಂಚ್ಯಾ ಸಯ್ರ್ಯಾಂನಿ ಮಾನ್ ಕೆಲೊ. ಮಾನೇಸ್ತಿಣ್ ಅನಿತಾ ಪಿಂಟೊ ಹಾಣಿಂ ಮಾನ್ ಕರ್ಚೆಂ ಕಾರ್ಯೆಂ ಚಲವ್ನ್ ವ್ಹೆಲೆಂ. ತ್ಯಾ ನಂತರ್ ಫಿರ್ಗಜ್ ಗೊವ್ಳಿಕ್ ಪರಿಷಧ್ ಉಪಾಧ್ಯಕ್ಷ್ ಹಾಣಿಂ ತಾಂಚ್ಯಾ ಶಿಕ್ಪಾ ವೆಳಾರ್ ಆನಿ ಕಾಮ್ ಕರ್ಚ್ಯಾ ಜಾಗ್ಯಾರ್ ಭಲಾಯ್ಕೆ ಶೆತಾಂತ್ ಕಸೆಂ ಕ್ರಿಯಾಳ್ ಜಾಲ್ಲ್ಯಾ ವಿಶ್ಯಾಂತ್ ತಾಂಚ್ಯಾ ಜಿವಿತಾಂತ್ಲ್ಯಾ ಥೊಡ್ಯಾ ಭೊಗ್ಣಾಂನಿ ತಾಂಚೊ ಅನ್ಭೋಗ್ ವಾಂಟುನ್ ಘೆತ್ಲೊ. ಲಕ್ಕಿ ಖೆಳ್ ಆಸಾ ಕೆಲ್ಲೊ. ವಿಗಾರ್ ಬಾಪ್ ಆನಿ ಸಂಪನ್ಮೂಲ್ ವ್ಯಕ್ತಿನ್ ಸೊಡ್ತೆರ್ ದೊಗಾಂಚಿ ನಾಂವಾ ವಿಂಚುನ್ ಕಾಡ್ಲಿಂ. ಕು| ವಿಯೋಲಾ ಮೇಘನಾ ಲೋಬೊ ಆನಿ ಕು| ಜ್ಯೋತ್ಸ್ನಾ ಮೊರಾಸ್ ಲಕ್ಕಿ ವಿಜೇತಕಾಂ ಜಾವ್ನ್ ವಿಂಚುನ್ ಆಯ್ಲಿಂ. ತಾಂಕಾ ವಿಗಾರ್ ಬಾಪಾಂನಿ ಇನಾಮಾಂ ದೀವ್ನ್ ಮಾನ್ ಕೆಲೆಂ.
ಉಪ್ರಾಂತ್ ಸೆವಾ ಆಯೋಗ್ ಪಂಗಡ್ ಸಂಚಾಲಕಿ ಸಿ| ಡೊ| ಸಾಧಾನಾಕ್ ವಾಮಂಜೂರ್ ರೇಮಂಡ್ಸ್ ಕಾಲೇಜಿಕ್ ವರ್ಗ್ ಜಾವ್ನ್ ವೆಚ್ಯಾ ವಗ್ತಾ ಆಯೋಗಾಂತ್ ಸಂಚಾಲಕಿ ಜಾವ್ನ್ ತಿಚಿ ಸೆವಾ ವಾಖಣುನ್ ವಿಗಾರ್ ಬಾಪಾಂನಿ ಶೊಲ್ ಪಾಂಗ್ರುನ್ ಆನಿ ಮಾನಾಂಚಾ ಸಯ್ರ್ಯಾಂನಿ ಫುಲ್ ಆನಿ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಸನ್ಮಾನ್ ಕೆಲೊ. ಉಪ್ರಾಂತ್ ವಿಗಾರ್ ಬಾಪಾಂನಿ ಭಲಾಯ್ಕೆ ಶೆತಾಂತ್ ವಾವ್ರ್ ಕರ್ಚೆಂ ಜೆಜುಚೆ ಮಿಸಾಂವ್ ಜಾವ್ನಾಸಾ; ಹಾಂತುನ್ ವಾವ್ರ್ ಕರ್ಚ್ಯಾ ಹರ್ಯೆಕ್ಲ್ಯಾಂಚಿ ಸೆವಾ ಉತ್ತೀಮ್ ಜಾವ್ನಾಸಾ. ವರ್ಸಾಕ್ ಎಕ್ ಪಾವ್ಟಿಂ ಪುಣಿಂ ಭಲಾಯ್ಕೆ ಶೆತಾಂತ್ಲ್ಯಾ ವಾವ್ರಾಡ್ಯಾಂನಿ ಸಾಂಗಾತಾ ಮೆಳ್ಳ್ಯಾರ್ ಭೋವ್ ಬರೆಂ ಆನಿ ಕಾರ್ಯಕ್ರಮ ವರ್ವಿಂ ಸಾಂಗಾತಾ ಮೆಳೊಂಕ್ ಅಪೂರ್ವ್ ಆವ್ಕಾಸ್. ಭಲಾಯ್ಕೆ ಶೆತಾಂತ್ ವಾವ್ರ್ ಕರ್ತ್ಯೆಲ್ಯಾಂಚಿ ವ್ಹಳಕ್ ಖಳಿತ್ ಜಾತಾ ಮ್ಹಣ್ ತಿಳ್ಸಿಲೆಂ. ಫಿರ್ಗಜೆಂತ್ಲ್ಯಾ ಭಲಾಯ್ಕೆ ಆಯೋಗಾಕ್ ಸೆರ್ವಾಂಕ್ ಉಲೊ ದಿಲೊ.
ಹಾಜರ್ ಆಸ್‌ಲ್ಲ್ಯಾ ಸರ್ವಾಂಚಿ ಹೊಗ್ಳಿಕ್ ಉಚಾರ್ನ್ ಸರ್ವ್ ವಾವ್ರಾಡ್ಯಾಂಕ್ ಉಲ್ಲಾಸ್ ಪಾಟವ್ನ್ ಸರ್ವ್ ಬರೆಂ ಮಾಗ್ಲೆಂ. ತಸೆಂಚ್ ಸಂಪನ್ಮೂಲ್ ವ್ಯಕ್ತಿ ಜಾವ್ನ್ ಹಾಜರ್ ಜಾಲ್ಲ್ಯಾ ಡೊ| ಉದಯ್ ಕುಮಾರ್ ಹಾಂಚ್ಯಾ ವಿಶ್ಯಾಂತ್ ಫಾದರ್ ಮುಲ್ಲರ್ಸ್ ಆಸ್ಪತ್ರೆಂತ್ ದಾಕ್ತೆರ್ ಉಣೆಂ ಆಸ್ಲ್ಯಾ ಸಂದರ್ಭರ್ 20 ಜಣ್ ದಾಕ್ತೆರಾಂಕ್ ಹಾಡ್ನ್ ಕುಮೊಕ್ ಕೆಲ್ಲೆ ಉಡಾಸ್ ಕಾಡ್ನ್ ತಾಂಚಿ ಸೆವಾ ವಾಖಣುನ್ ತಾಣಿ ಆಯ್ತಾರ್ ಜಾಲ್ಯಾರಿ ಆಜ್ ವೇಳ್ ಕರ್ನ್ ಹ್ಯಾ ಕಾರ್ಯಕ್ರಮಕ್ ಹಾಜರ್ ಜಾಲ್ಲ್ಯಾಕ್ ತಾಂಚೊ ಉಪ್ಕಾರ್ ಭಾವುಡ್ಲೊ.
ತಶೆಂಚ್, ಕಾರ್ಯಕ್ರಮ್ ಭೋವ್ ಅಪುರ್ಬಾಯೆನ್ ಮಾಂಡುನ್ ಹಾಡುಂಕ್ ಕುಮೊಕ್ ಕೆಲ್ಲ್ಯಾ ಸಂಯೋಜಕಿ, ಸಂಚಾಲಕಿ, ಕಾರ್ಯದರ್ಶಿ ಆನಿ ಸಾಂದ್ಯಾಕ್ ಹೊಗ್ಳಿಕ್ ಉಚಾರ್ಲಿ. ಉಪ್ರಾಂತ್, ಡೊ| ಉದಯ್ ಕುಮಾರ್ ಹಾಣಿಂ, ಭಲಾಯ್ಕೆ ಶೆತಾಂತ್ ವಾವ್ರ್ ಕರ್ತಾನಾ, ಪಿಡೆಸ್ತಾಂಕ್ ಹಾಸೊ ದೀವ್ನ್, ಸಕಾರಾತ್ಮಕ್ ಚಿಂತ್ಪಾನ್ ತಾಂಚಿ ಸೆವಾ ಕರ್ನ್, ಸಕಾರಾತ್ಮಾಕ್ ಉಲೊವ್ಣ್ಯಾನ್ ಸ್ಪಂದನ್ ಕರ್ನ್, ಪಿಡೆಸ್ತಾಂ ಥಂಯ್ ಭರ್ವಸೊ ದೀವ್ನ್ ತಾಂಚಿ ಸೆವಾ ಕೆಲ್ಯಾರ್ ಪಿಡೆಸ್ತಾಂ ಥಂಯ್ ವೆಗ್ಗಿಂಚ್ ಬರೆಂಪಣ್ ಜಾತಾ ಆನಿ ತಿಂ ವೆಗ್ಗಿಂಚ್ ಬರಿಂ ಜಾತಾತ್, ಮ್ಹಳ್ಳೊ ಭರ್ವಸೊ ತಾಂಚೆ ಥಂಯ್ ಉದೆತಾ ಮ್ಹಣ್ ವಿವಿಧ್ ದೃಷ್ಟಾಂತಾ ಮುಕಾಂತ್ರ್ ವಿವರ್ ದಿಲೊ ಆನಿ ಭಲಾಯ್ಕೆ ಶೆತಾಂತ್ ವಾವ್ರ್ ಕರ್ಚ್ಯಾ ಸರ್ವಾಂಕ್ ಶಾಭಾಸ್ಕಿ ಪಾಟಯ್ಲಿ.
ಉಪ್ರಾಂತ್ ವಿಗಾರ್ ಬಾಪಾಂನಿ ಡೊ| ಉದಯ್ ಕುಮಾರ್ ಹಾಂಕಾ ಉಗ್ಡಾಸಾಚಿ ಕಾಣಿಕ್ ದೀವ್ನ್, ವಿಗಾರ್ ಬಾಪಾಕ್ ಆನಿ ಕಾರ್ಯದರ್ಶಿಕ್, ಉಪಾಧ್ಯಕ್ಷಾನ್ ಆನಿ ಡೊ.ಉದಯ್ ಕುಮಾರ್ ಹಾಣಿಂ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ. ಭಲಾಯ್ಕೆ ಆಯೋಗ್ ಕಾರ್ಯದರ್ಶಿ ಶ್ರೀಮತಿ ವಿಲ್ಮಾ ಕ್ರಾಸ್ತಾ ಹಾಣಿಂ ಕಾರ್ಯಕ್ರಮ್ ಯಶಸ್ವಿ ಜಾಂವ್ಕ್ ಕಾರಣ್ ಜಾಲ್ಲ್ಯಾ ಸರ್ವಾಂಚೊ ಉಪ್ಕಾರ್ ಭಾವುಡ್ಲೊ.
ಪಿ.ವೈ.ಸಿ ಸಾಂದೊ, ಶೋನ್ ಫೆರ್ನಾಂಡಿಸ್ ಹಾಣೆಂ, ತಸ್ವಿರ್ ಕಾಡ್ನ್, ಉಗ್ತಾವಣೆಚೆ ಲೋಗೊ ಆನಿ ಸ್ಟಿಕರ್ಸ್ ಜ್ಯೋತ್ಸ್ನಾ ಗ್ಲ್ಯಾನಿಟಾ ನಜರೆತ್ ಆನಿ ಪೋಸ್ಟರ್ ಲೆಸ್ಟರ್ ಮಿನೇಜಸ್ ಹಾಣಿಂ ಸಹಕಾರ್ ದಿಲೊ. ಶಿಕ್ಪಾ ಆಯೋಗ್ ಕಾರ್ಯದರ್ಶಿ - ಶ್ರೀಮತಿ ಗ್ರೆಟ್ಟಾ ನಜರೆತ್ ಹಾಣಿಂ ಭೋವ್ ಅಪುರ್ಬಾಯೆನ್ ಕಾರ್ಯೆಂ ನಿರ್ವಾಹಣ್ ಕೆಲೆಂ. ಕಾಫಿ-ಫಳ್ಹಾರ್ ಪ್ರಾಯೋಜಕ್ ಜಾವ್ನ್ ಉಪಾಧ್ಯಕ್ಷ್ ರೋಮನ್ಸ್ ಲೋಬೊ ಹಾಣಿಂ, ಮಾನ್ವೆಲ್ ಪತ್ರಾವೊ ಆನಿ ನಾಂವ್ ನಾಕಾ ಮ್ಹಣ್, ಫಿರ್ಗಜೆಚ್ಯಾ ಎಕಾ ಕುಟ್ಮಾನ್, ತಶೆಂಚ್ ಸೆವಾ ಆಯೋಗ್ ಪಂಗ್ಡಾಚ್ಯಾ ಕಾರ್ಯದರ್ಶಿನಿಂ ಆನಿ ಆಯೋಗಾಚಾ ಸಾಂದ್ಯಾನಿ ಸ್ವ-ಖುಶೆಚಿ ಕುಮೊಕ್ ದೀವ್ನ್ ಕಾರ್ಯಕ್ರಮಕ್ ಸಹಕಾರ್ ದಿಲೊ.
ಫಿರ್ಗಜ್ ವಿಗಾರ್, ಫಿರ್ಗಜ್ ಗೊವ್ಳಿಕ್ ಪರಿಷಧ್ ಉಪಾಧ್ಯಕ್ಷ್, ಕಾರ್ಯದರ್ಶಿ ಆನಿ ಆಯೋಗ್ ಸಂಯೋಜಕಿ, ಸಂಚಾಲಕಿ, ಕಾರ್ಯದರ್ಶಿ, ಸಾಂದ್ಯಾಚ್ಯಾ ಆನಿ ಸರ್ವ್ ಭಲಾಯ್ಕೆ ಶೆತಾಂತ್ಲ್ಯಾ ವಾವ್ರಾಡ್ಯಾಂಚ್ಯಾ ಹಾಜರ್ಪಣಾನ್ ಕಾರ್ಯಕ್ರಮ್ ಯಶಸ್ವಿ ಜಾಲೆಂ. ಭಲಾಯ್ಕೆ ಶೆತಾಂತ್ಲಿ ವಾವ್ರಾಡಿ ಆನಿ ಆಯೋಗಾಚೆ ಸಾಂದೆ ಅಶೆಂ 55 ಜಣಾಂ ಹಾಜರ್ ಆಸ್‌ಲ್ಲಿ.