2025-26 ವ್ಯಾ ಕ್ರಿಸ್ತೀ ಶಿಕ್ಷಣ್ ವರ್ಸಾಚೆಂ ಉದ್ಘಾಟನ್
ಕ್ರೀಸ್ತಿ ಶಿಕ್ಷಣ್ ಆಯೋಗಾಚ್ಯಾ ಮುಖೇಲ್ಪಣಾಖಾಲ್ "ಭಾವಾರ್ಥಾಚ್ಯೆ ಶಿಕೊವ್ಣೆನ್ ಭರ್ವಶಾನ್ ಭರ‍ುನ್" ಮ್ಹಳ್ಳ್ಯಾ ಧ್ಯೇಯಾಖಾಲ್ ಆಯ್ತಾರಾಚೆಂ ಭಾವಾರ್ಥಿ ಶಿಕ್ಷಣ್ ವರ್ಸಾಚೆಂ ಉದ್ಘಾಟನ್, ಜೂನ್ 1 ತಾರಿಕೆರ್, ಆಯ್ತಾರಾ ಸಕಾಳಿಂ 7:30 ವರಾರ್, ಪವಿತ್ರ್ ಮಿಸಾಚಾ ಬಲಿದಾನಾ ವೆಳಾರ್ ಚಲವ್ನ್ ವೆಲೆಂ.
ಫಿರ್ಗಜ್ ವಿಗಾರ್ ಭೊ| ಮಾ| ಬಾ| ರುಡೊಲ್ಫ್ ರವಿ ಡೆಸಾ, ಫಿರ್ಗಜ್ ಉಪಾಧ್ಯಕ್ಷ್ - ಮಾನೇಸ್ತ್ ರೋಮನ್ಸ್ ಲೋಬೊ, ಕಾರ್ಯದರ್ಶಿ - ಮಾನೇಸ್ತ್ ಜೊನ್ಸನ್ ಲೋಬೊ, ಎಕಾ ಭುರ್ಗ್ಯಾಚಿ ಆವಯ್-ಬಾಪಯ್, 6(ಸ) ಜಣಾಂ ಭಾವಾರ್ಥಿ ಶಿಕ್ಷಣಾಚಿ ಭುರ್ಗಿಂ, ದೊಗಾಂ ಕ್ರೀಸ್ತಿ ಶಿಕ್ಷಣ್ ಶಿಕೊಂವ್ಚಿ ಶಿಕ್ಷಕಾಂ, ಪುರ್ಶಾಂವಾರ್ ಯೇವ್ನ್ ಆಲ್ತಾರಿ ಮುಕಾರ್ ರಾವ್ಲಿ. ತ್ಯಾ ನಂತರ್ ವಿಗಾರ್ ಬಾಪಾಂನಿ ಶಿಕ್ಷಕಾಂಕ್ ತಾಂಚೆ ಮಿಸಾಂವ್ ಸಮ್ಜುನ್ ಘೆವ್ನ್, ಭುರ್ಗ್ಯಾಂಕ್ ಭಾವಾರ್ಥಾಚಿಂ ಸತಾಂ ಶಿಕೊಂವ್ಕ್ ಆನಿ ತಾಂಕಾಂ ಭರ್ವಶಾನ್ ಭರ‍ೊಂಕ್ ತಯಾರ್ ಜಾಂವ್ಚ್ಯಾಕ್ ಪವಿತ್ರ್ ಪುಸ್ತಕ್ ಹಾತಾಂತರ್ ಕೆಲೊ.
ಹ್ಯಾ ಸಗ್ಳ್ಯಾ ವರ್ಸಾ ಭುರ್ಗ್ಯಾಂನಿ ಉಮೆದಿನ್ ಆನಿ ಗುಂಡಾಯೆನ್ ಭಾವಾರ್ಥ್ ಶಿಕೊನ್, ಭರ್ವಶಾನ್ ಭರ‍್ಚ್ಯಾಕ್ ವಿಗಾರ್ ಬಾಪಾಂನಿ ಭಾವಾರ್ಥಿ ಶಿಕ್ಷಣಾಚೆ ಪಾಠ್ ಪುಸ್ತಕ್ ಭುರ್ಗ್ಯಾಂಕ್ ದಿಲೆ. ಉಪ್ರಾಂತ್ ಫಿರ್ಗಜ್ ವಿಗಾರ್, ಉಪಾಧ್ಯಕ್ಷ್, ಕಾರ್ಯದರ್ಶಿ, ಭುರ್ಗ್ಯಾಂಚಿ ಆವಯ್-ಬಾಪಯ್ ಆನಿ ಶಿಕ್ಷಕಾಂನಿ ವೆದಿರ್ ದವರ್’ಲ್ಲ್ಯಾ ಏಕ್ ಸೊಭಿತ್ ಫಳಾಚ್ಯಾ ಝಡಾಕ್ ಉದಾಕ್ ವೊತುನ್ ವಿಶಿಷ್ಟ್ ರಿತಿನ್ ಉದ್ಘಾಟನ್ ಕೆಲೆಂ.
ವಿಗಾರ್ ಬಾಪಾಂನಿ ಆಪ್ಲ್ಯಾ ಸಂದೇಶಾಂತ್ ಭುರ್ಗ್ಯಾಂಕ್ ಉಮೆದಿನ್, ಭಾವಾರ್ಥ್ ಶಿಕೊವ್ನ್ ಭರ್ವಶಾನ್ ಭರ‍್ಚ್ಯಾಕ್ ಉಲೊ ದಿಲೊ. ತ್ಯಾ ನಂತರ್, ವಿಗಾರ್ ಬಾಪಾಂನಿ ಕ್ರೀಸ್ತಿ ಶಿಕ್ಷಣ್ ಶಿಕೊಂವ್ಕ್ ಆಯಿಲ್ಲ್ಯಾ ನವ್ಯಾ ಧರ್ಮ್ ಭಯ್ಣಿಂಕ್ ಸ್ವಾಗತ್ ಕೆಲೆಂ ಆನಿ ಎದೊಳ್ ಕ್ರೀಸ್ತಿ ಶಿಕ್ಷಣ್ ಶಿಕೊಂವ್ಕ್ ಸಹಕಾರ್ ದಿಲ್ಲ್ಯಾ ಸರ್ವ್ ಶಿಕ್ಷಾಕಾಂಚೊ ಉಪ್ಕಾರ್ ಬಾವುಡ್ಲೊ.
ಹೆಂ ಸಗ್ಳೆ ಉದ್ಘಾಟನಾಚೆಂ ಕಾರ್ಯೆಂ ಕ್ರೀಸ್ತಿ ಶಿಕ್ಷಣ್ ಸಂಯೋಜಕಿ - ಶ್ರೀಮತಿ ಜೆಸಿಂತಾ ಪೇರಿಸಾನ್ ಚಲೊವ್ನ್ ವೆಲೆಂ. ಪ್ರಮಿತ್ ಪಿಂಟೊನ್ ತಸ್ವೀರ್ ಕಾಡ್ನ್ ಸಹಕರ್ಸಿಲೆಂ.