ಪ್ರಧಾನ್ ಯಾಜಕ್ ಜಾವ್ನ್ ಮಾ| ಬಾ| ವಿಕಾಸ್ ಪಿರೇರಾಚೆ ಪಯ್ಲೆಂ ಮೀಸ್

ಆಮ್ಚ್ಯಾ ಫಿರ್ಗಜೆಂತ್ ದಿಯಾಕೊನಾಚಿ ಸೆವಾ ದೀವ್ನ್ ಆಯ್ಲೆವಾರ್ ಯಾಜಕೀ ದೀಕ್ಷಾ ಜೊಡ್’ಲ್ಲ್ಯಾ ಮಾ। ವಿಕಾಸ್ ಪಿರೇರಾ ಬಾಪಾಂನಿ ಮೇ ಮಹಿನ್ಯಾಚ್ಯಾ 11 ತಾರಿಕೆರ್ ಆಯ್ತಾರಾ ಸಕಾಳಿಂ 7:30 ವ್ಹರಾರ್ ಆಮ್ಚ್ಯಾ ಫಿರ್ಗಜೆಂತ್ ಪಯ್ಲೆ ಪಾವ್ಟಿಂ ಪವಿತ್ರ್ ಎವ್ಕರಿಸ್ತಾಚೆಂ ಬಲಿದಾನ್ ಭೆಟಯ್ಲೆಂ. ಜೆಜು ಬರ‍್ಯಾ ಗೊವ್ಳ್ಯಾ ಥಂಯ್ ಭರ್ವಶ್ಯಾಂ; ತಾಚ್ಯೊ ವಿಶ್ವಾಸಿ ಶೆಳಿಯೊ ಜಾವ್ಯಾಂ ಮ್ಹಳ್ಯಾ ಸಂದೇಶಾಖಾಲ್ ದೆವಾಚೆ ಉತರ್ ಮೊಡುನ್ ದೇವ್ ಆಪವ್ಣೆಂ ವಿಶಿಂ ಅರ್ಥಭರಿತ್ ಪ್ರಸಂಗ್ ದಿಲೊ. ಫಿರ್ಗಜ್ ವಿಗಾರ್ ಭೊ। ಮಾ। ಬಾ ರುಡೊಲ್ಫ್ ರವಿ ಡೆಸಾ, ಮಾ। ಬಾ। ದೊ। ಪಿಯುಸ್ ಪಿಂಟೊ, ಮಾ। ಬಾ। ಅನಿಲ್ ಫೆರ್ನಾಂಡಿಸ್ ಹಾಣಿಂ ಸಹ ಭೆಟವ್ಣಿ ಕೆಲಿ. ಹ್ಯಾಚ್ ವೆಳಾ ಪವಿತ್ರ್ ಸಭೆಕ್ ನವ್ಯಾನ್ ವಿಂಚುನ್ ಆಯಿಲ್ಲ್ಯಾ ಪಾಪಾ ಲಿಯಾಂವ್ ಚೊವ್ದಾವೊ ಹಾಂಚೆ ಪಾಸತ್ ತಶೆಂಚ್ ಪ್ರಸಕ್ತ್ ಜಾಂವ್ಚಿ ಝಜಾಂ ವೆಗಿಂಚ್ಚ್ ರಾವೊನ್ ಸಂಸಾರಾರ್ ಶಾಂತಿ ಸಮಾಧಾನ್ ರಾಜ್ ಜಾಂವ್ಚ್ಯಾಕ್ ಆನಿ ಝಜಾ ವರ್ವಿ ಕಷ್ಟೊಂಚಾ ಲೋಕಾ ಖಾತಿರ್ ಮಾ। ಬಾ। ಅನಿಲ್ ಕಿರಣ್ ಫೆರ್ನಾಂಡಿಸ್ ಬಾಪಾಂನಿಂ ಮಾಗ್ಣೆಂ ಕೆಲೆಂ.

ಮಿಸಾ ಉಪ್ರಾಂತ್ ಮಾ। ಬಾ। ವಿಕಾಸ್ ಪಿರೇರಾಕ್ ಫಿರ್ಗಜೆ ತರ್ಫೆನ್ ವಿಗಾರ್ ಬಾಪಾಂನಿ ಶಾಲ್ ಪಾಂಗ್ರುನ್, ಹಾಜರ್ ಆಸ್’ಲ್ಲ್ಯಾ ಯಾಜಕಾಂನಿ ಫುಲಾಂಚೊ ಹಾರ್ ಘಾಲ್ನ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಮಾನೆಸ್ತ್ ರೊಮನ್ಸ್ ಲೋಬೊ, ಕಾರ್ಯದರ್ಶಿ ಮಾನೆಸ್ತ್ ಜೊನ್ಸನ್ ಲೋಬೊನ್, ಪೊಂಪೈ ಸಾಯ್ಬಿಣಿಚೆಂ ಪಾಯ್ನೆಲ್ ಯಾದಿಸ್ತಿಕಾ ಜಾವ್ನ್ ದೀವ್ನ್ ಸನ್ಮಾನ್ ಕೆಲೆಂ. ಮಾನೆಸ್ತ್ ರೊಮನ್ಸ್ ಲೋಬೊನ್ ಪ್ರಸ್ತಾವಿಕ್ ಜಾವ್ನ್ ಉಲೊವ್ನ್ ಕಾರ್ಯೆಂ ಚಲವ್ನ್ ವೆಲೆಂ. ವಿಗಾರ್ ಬಾಪಾಂನಿ ಸರ್ವಾಂಚ್ಯಾ ತರ್ಫೆನ್ ಮಾ। ಬಾ। ವಿಕಾಸ್ ಪಿರೇರಾಕ್ ಸರ್ವ್ ಬರೆಂ ಮಾಗ್ಲೆಂ. ಸನ್ಮಾನಿತ್ ಬಾಪಾಂನಿ ಉಲೊವ್ನ್ ದಿಯಾಕೊನ್ ಜಾವ್ನ್ ಆಸ್ತಾನಾ ದಿಲ್ಲ್ಯಾ ಸಹಕಾರಾಕ್ ತಶೆಂಚ್ಚ್ ಅಪ್ಣಾಕ್ ಫಿರ್ಗಜೆಂತ್ ಪವಿತ್ರ್ ಎವ್ಕರಿಸ್ತಾಚೆಂ ಬಲಿದಾನ್ ಭೆಟಂವ್ಕ್ ಅವ್ಕಾಸ್ ಕರ್ನ್ ದಿಲ್ಲ್ಯಾ ವಿಗಾರ್ ಬಾಪಾಂಚೊ ಆನಿ ಸರ್ವಾಂಚೊ ಉಪ್ಕಾರ್ ಭಾವುಡ್ಲೊ. ಮಿಸಾ ಉಪ್ರಾಂತ್ ವಿಗಾರ್ ಬಾಪಾಂನಿ ಆಸಾ ಕೆಲ್ಲೊ ಕಾಫಿ ಪ್ಹಳಾರ್ ಸರ್ವಾಂನಿ ಸೆವ್ಲೊ.